Quote:
ராஜ் டிவியில் "சூப்பர் டாப் டென், சினி மினி, தினம் தினம் புது ரீல், ஓடி விளையாடு பாப்பா' நிகழ்ச்சிகளை தொகுத்து வழங்கும் சோனியாஸ்ரீ, "கிரேஸி மோகனின், "சாக்லெட் கிருஷ்ணா'விலும் நாயகியாக நடிக்கிறார். "பிள்ளைங்க விரும்பியதை படிக்கவும், விரும்பிய வேலையை செய்யவும் அனுமதிச்சாங்கன்னா ஆர்வமா உழைப்பாங்க, நினைச்சதை சாதிப்பாங்க' என அழுத்தம் திருத்தமாக சொன்ன சோனியாஸ்ரீயின் ஆர்வப் பேட்டி:
* நடிக்க வேண்டாம் என்று சொன்ன பிறகும், நடித்தே ஆவேன் என்று வந்திருப்பது பற்றி?
"டிவி"யில பாட்டு பார்த்தா, ரேடியோவில் பாட்டு கேட்டா ஆடிடுவேன். இரண்டு வயசுலிருந்தே இப்படி ஒரு இன்ட்ரஸ்ட் எனக்கு இருக்கு. இவள டான்ஸ் கிளாஸ்ல விட்டா நல்லா ஆடுவாளேன்னு தெரிஞ்சவங்க சொல்ல, என் அம்மா என்னை மூன்று வயதிலேயே பரதநாட்டியம் கத்துக்க அனுப் பினாங்க. மியூசிக் காலேஜ்ல சேர்ந்து பரத நாட்டியம் கத்துக் கிட்டேன். டில்லி, மும்பை, கோல்கட்டா, திருவையாறு என பல இடங்களில் நிறைய ஸ்டேஜ் புரோகிராம் செஞ்சிருக்கேன். இருந்தாலும் நான் இந்த பீல்டுக்கு வருவதில் உறவினர்களில் பலருக்கு விருப்பமில்லை. பிடிக்காத வேலையை செஞ்சு அவஸ்தை படுறதை விட, பிடிச்ச வேலையை செஞ்சு சாதித்து காட்டணும்கிற நினைப்பில இந்த பீல்ட்டுக்குள்ள வந்திருக்கேன். நினைச்சதை சாதிப்பேன்.
* உறவினர்கள், நல்லதுக்குத் தானே இப்படி சொல்லியிருப்பர் என்று நீங்கள் நினைக்கவில்லையா?
பிள்ளைகளோட எண்ணத்தை தெரிஞ்சுக்கிட்டு அவங்களோட வளர்ச்சிக்கு பெற்றோர்களும், உறவினர்களும் வழி காட்டணும். நான் டாக்டருக்கு படிக்க நினைச்சேன், அதனால நீ டாக்டருக்கு தான் படிக்கணும், நான் வக்கீலுக்கு படிக்க நினைச்சேன் நீ சட்டப் படிப்பு தான் படிக்கணும்ன்னு பெற்றோர்கள் கட்டாயப்படுத்தினால், விருப்பம் இல்லாத படிப்பை பிள்ளைங்க எப்படி முழுமையாக படிப்பாங்க? பிள்ளைங்க விரும்பியதை படிக் கவும், விரும்பிய வேலையை செய்யவும் அனுமதிச்சாங் கன்னா ஆர்வமா உழைப்பாங்க, நினைச்சதை சாதிப்பாங்க. எனக்கு நடிப்பு பிடிச்சிருக்கு, நடனம் பிடிச்சிருக்கு. நிச்சயம் இதில உயர்ந்த இடத்திற்கு வரணும்கிற ஆர்வமிருக்கு. அதற்கான முயற்சியும் செஞ்சுட்டிருக்கேன்.
* அலுவலகத்துக்கு போய் வேலை செய்யப்பிடிக்காமல்தான் டிவி, நாடகம் பக்கம் வந்துவிட்டீர்கள் என்று பேசப்பட்டதே?
ஆபீசிற்கு போய் டயத்திற்கு வேலை செய்யறதில் எனக்கு ஆர்வமில்லை. நடிப்பு மேல தான் எனக்கு ஆர்வமிருக்கு. இதில தான் எனக்கு ஆத்ம திருப்தி கிடைக்குது. அதனால் தான் இந்த பீல்டை நான் செலக்ட் பண்ணியிருக்கேன்.
* வீட்டில் எதற்கெடுத்தாலும் கட்டுப்பாடு போடுகிறார்கள் என்று வேலைக்கு போகும் பெண்களின் புலம்பல் பற்றி?
வேலைக்கு போகிற பெண்கள் பாதுகாப்பா போயிட்டு வரணும். பிரச்னை ஏதும் வந்திடக் கூடாதுன்னு நினைக்கிறது இயல்பு தான். வேலைக்கு போகிற இடத்தில் பெண்களுக்கு பாதுகாப்பு எப்படியிருக்குன்னு வீட்டார் நினைக்கிறதில் தவறில்லை. பணிபுரிகின்ற இடங்களில் பெண்களுக்கு பாதுகாப்பு அவசியம் தேவை. கால் சென்டர், ஐ.டி., பார்க்குகளில் இரவு பகலா வேலை நடந்திட்டிருக்கு. இந்தச் சூழ்நிலையில் நீ அந்த நேரத்தில வேலைக்கு போகக் கூடாது, இந்த நேரத்தில் வேலைக்கு போகக் கூடாதுன்னு கட்டுப்பாடு போடுவதை விட பெண்கள் வேலைக்கு போயிட்டு பாதுகாப்பா வந்து சேர்வதற்கு, வீட்டிலிருக்கும் ஆண்களும் உதவியாக இருந்துட்டா இப்படி பிரச்னை வராதுன்னு சொல்வேன்.
* டிவியில் இருந்து மேடை நாடகத்திற்கு வந்திருப்பது பற்றி?
கிரேஸி மோகனும், மாது பாலாஜியும் நிறைய நாடகங்களை நடத்தியிருக்காங்க. நாடக உலகில் முன்னணியில இருந்திட்டிருக்காங்க. சினிமாவுல ஹவுஸ் புல் காட்சி ஒடுதோ இல்லையோ இவங்களோட டிராமாவெல்லாம் ஹவுஸ் புல் காட்சிகளாகிற அளவுக்கு இவர்களுக்கென்று தனி ரசிகர்கள் கூட்டமே இருக்கு. இவுங்களோட சாக்லேட் கிருஷ்ணா நாடகத்துல மாது பாலாஜிக்கு ஜோடியா நடிக்க வாய்ப்பு கிடைச்சது. நடிச்சிட்டிருக்கேன். கிரேஸி மோகனும், பாலாஜியும் நல்லா நடிக்க என்கரேஜ் பண்றாங்க. அவுங்களோட நடிக்கிற எல்லாருக்கும் நல்லா நடிக்கிறதுக்கான வாய்ப்பை ஏற்படுத்தி கொடுக்கிறாங்க. இப்படி ஒரு "டீம்'ல நடிக்கிறதுக்கு சந்தோஷமாயிருக்கு. உற்சாகமாகக் கூறி விடைபெற்றார் சோனியாஸ்ரீ.