அனைத்து நண்பர்களுக்கும் அன்பு வணக்கங்கள் - ஜோ, கார்த்திக் உள்பட.
சதீஷ் சார், பார்த்த சாரதி சார், முரளி சார், பம்மலார், மற்றும் இத்திரியின் வாயிலாக வேண்டுகோள் விடுத்த நண்பர்களுக்கும் அவர்களுடைய உளமார்ந்த அன்புக்கும் நன்றி. ஹப்பாடா தொலைந்தான் என்று நிம்மதிப் பெருமூச்சு விட்டவர்களுக்கு திரும்பவும் தொல்லை ஆரம்பித்து விட்டது என்றும் கூறிக்கொள்கிறேன் ...ஹ...ஹ...ஹா...
தவிர்க்க முடியாத விஷயத்தைக் கூற விழைகிறேன்.
இங்கே எப்படி கடும் எதிர்ப்பை மீறியும் அவற்றை எதிர்கொண்டும் நடிகர் திலகத்தின் சிலையை கலைஞர் நிறுவினாரோ அதே போல் புதுவையில் ரங்கசாமி அவர்களும் கடும் எதிர்ப்பை சந்தித்து தான் நடிகர் திலகத்தின் சிலையை அமைத்துள்ளார். அங்கிருந்த காங்கிரஸ் பிரமுகர்கள் வழக்கு தொடரவில்லை. அது ஒன்று தான் வித்தியாசம். அப்படி சிலையை நிறுவிவிட்டு ஒரு சந்தர்ப்பத்தில் சென்னை வந்து அன்னை இல்லத்தில் நடிகர் திலகத்தின் குடும்ப உறுப்பினர்களை சந்தித்து வாழ்த்து பெற்றிருக்கிறார். அப்போது நடிகர் திலகம் எப்போதும் அமர்ந்து உணவருந்தும் இருக்கை அவருக்கு அளிக்கப் பட்டுள்ளது. அதற்கு அவர் மிகவும் மனம் நெகிழ்ந்து, முதலில் தான் ஒரு தீவிர சிவாஜி ரசிகர் மட்டுமல்ல, அவரைத் தலைவனாக ஏற்றவன், என் தலைவருடைய இருக்கையை எனக்களித்து என்னை பெருமிதப் படுத்திவிட்டீர்கள் என்று கூறி உணர்வுடன் நன்றி கூறியிருக்கிறார்.
அப்படிப்பட்டவரைத்தான் பாராட்டியும் வாழ்தது தெரிவித்தும் பதிவிடப்பட்டது.
சகோதரி ஜெயலலிதா அவர்களைப் பொறுத்த வரையில் இனிமேல் நல்லபடியாக ஆட்சி புரியட்டும் என்கிற நல்லெண்ணத்தில் தான் நாம் வாழ்த்தினோம். அது வரை திரையுலகில் வெறும் அழகு பொம்மையாக சித்தரிக்கப் பட்டிருந்த தாம் நடிகர் திலகத்துடன் நடிக்கத் தொடங்கிய பின்னர் தான் தாம் ஒரு நடிகை என்பதை உணரத் தொடங்கினேன் என்ற தன் எண்ணத்தை பல சந்தர்ப்பங்களில் வெளிப்படுத்தியிருக்கிறார். அப்படிப் பட்டவர் மீண்டும் நல்ல நிலைக்கு வரும் போது வாழ்த்துவதில் தவறேது.
அது மட்டுமன்றி நடிகர் திலகம் தன் குடும்ப வாழ்க்கையில் சந்தித்த பிரச்னைகளுக்கு அவர் மட்டுமே முழு காரணமாக கூற முடியாது என்றாலும் அவரும் ஒரு காரணாக இருந்தார் என்பதை மறுப்பதற்கில்லை. என்னுடைய சிற்றறிவிற்கு எட்டியவரை தன்னுடைய வாழ்நாளில் இது வரை நடிகர் திலகத்தை அவர் விமர்சித்ததில்லை என்ற எண்ணத்தின் அடிப்படையிலும் தான் அவருக்கு வாழ்த்துக்கள் தெரிவிக்கப் பட்டது. அது மட்டுமல்ல, நடிகர் திலகத்தின் ரசிகர்கள் பலர் இன்று சட்ட மன்றத்திற்கு தேர்வாகியுள்ளனர் என்று ஒரு தகவலும் பரவலாக பேசப் படுகிறது. அது உண்மையாயின் அதுவும் நமக்கு மிகுந்த மகிழ்வூட்டும்.
மற்ற படி எந்த ஆட்சியாளரானாலும் மக்களின் விருப்பம் உள்ள வரைதான் தொடர முடியும் என்பதை மற்ற மாநிலங்களை விட தமிழக மக்கள் பல முறை நிரூபித்திருக்கிறார்கள். இன்றைக்கு தி.மு.க.விற்கு ஏற்பட்ட தோல்வி நாளைக்கே ஜெயலலிதா அவர்களுக்கு ஏற்படாது என்பதற்கு எந்த வித உத்தரவாதமும் இல்லை. அவருடைய ஆட்சி முறையைப் பொறுத்தே அவருடைய வெற்றி தோல்வி அமையும். இதற்கு 1996 ஒரு உதாரணம்.
நம்மைப் பொறுத்த வரை நாம் நல்லெண்ணத்தின் அடிப்படையில் இனிமேல் அவர் நல்லாட்சி புரியட்டும் என்கிற எதிர்பார்ப்போடு வாழ்த்தியுள்ளோம்.
இதுவும் நமக்கு நடிகர் திலகத்தின் பாடல் கொடுத்த எண்ண ஓட்டம் தான். அது என்ன. நீங்களே பாருங்கள், கேளுங்கள்..
http://www.youtube.com/watch?v=9YiNDzAL3P4
அனைவருக்கும் அடியேனின் உளமார்ந்த நன்றிகளும் பாராட்டுக்களும்.
தொடர்ந்து தங்கள் அன்பையும் வன்மையான கண்டனங்களையும் எதிர்நோக்கும்,
ராகவேந்திரன்