-
நமது தலைவர் அவர்கள் உயிர் துறந்து 32 ஆண்டுகள் ஆகிவிட்டது இன்றும் பல சர்வேயில் மக்களின் உள்ளம் கவர்ந்த தலைவர்களின் பட்டியலில் முதலிடத்தில் இருக்கிறார் என்றால் அவர் வாழ்ந்த வாழ்க்கை அப்படி சினிமா துறையிலும் சரி முதல்வராக ஆன பிறகும் சரி மக்கள் நலன் ஒன்றையே கருத்தில் கொண்டு தனது வாழ்க்கையை அப்படியே அமைத்துக் கொண்ட காரணத்தால் இன்னும் இந்த உலகம் உள்ளளவும் அவர் புகழ் மறையாது ஓங்கும் என்பது இப்பவே நமக்கு நன்றாக தெரிகிறது பேஸ்புக்கில் அவரைப்பற்றி எவ்வளவு கருத்துக்கள் வந்து கொண்டிருக்கிறது என்னைப்போன்ற எத்தனையோ பக்தர்கள் அதையெல்லாம் படித்து மகிழ்ச்சி அடைந்து கொண்டிருக்கின்றார்கள் இதற்கெல்லாம் காரணம் மனிதநேயம் ஒன்றே மகத்தானது என்று தலைவர் அவர்கள் கடைப்பிடித்து தான்........ Thanks...
-
உண்மைதான் அந்தபுண்ணியவான் ஆட்சியில் நல்ல மழை பெய்யும் விளைச்சல் அமோகம் விலைவாசி ஏற்றம் இல்லை விவசாயிகள் தற்கொலை இல்லை பஞ்சம் பட்டினியில்லை மொத்ததில் சொல்லபோனால் அவர் ஆட்சி தமிழகத்தில் பொற்காலம் அப்படிப்பட்ட புன்னியவானை தமிழகம் இழந்துவிட்டது ஐய்யா......... Thanks...
-
அந்த ஆண்டு நல்லமழை காரணமாக வடசென்னை நீரில்மூழ்கியது முதல்வர் MGR பாதிக்கபட்ட இடங்களை நேரில் பார்வையிட்டு மீட்பு நிவாரணம் ஆகிய பணிகளைமேற்கொண்டார்..... Thanks...
-
வணக்கம் நண்பர்களே!! புரட்சித்தலைவர் எம்ஜிஆர் அவர்களின் சிறப்பு குணங்கள் என கேட்டால் பெரும்பாலானவர்கள் அவருடைய வள்ளல் தன்மை, தொழில் பக்தி, பெரியவர்களை மதித்தல்,பகைவர்களை மன்னித்தல், தொண்டர்களிடம் பாசம் என நிறைய கூறுவார்கள்... பலரும் கூறத்தவறிய இன்னொரு சிறப்பு தகுதி அவருக்கு உண்டு, அது....
ஒருவருடன் பழகிய சில தினங்களிலேயே பிற்காலத்தில் அவர் என்னவாக வருவார் என சக மனிதர்களின் திறமையை கண்டறிவது.... சில சுவாரசியமான நிகழ்வுகள்
பல ஆண்டுகளாக அன்னை சத்யா ட்ரஸ்ட் மூலம் எம்ஜிஆர் படிக்க வைத்த ஆளாக்கிய நபர்களின் எண்ணிக்கை அதிகம். 1950களில் தொடங்கிய இந்த சேவை அவர் மறைவுக்குப் பின்னும் எம்ஜிஆர் ட்ரஸ்ட் மூலம் தொடர்கிறது....
அப்படி அவரால் படித்தவர்கள் தங்கள் படிப்பு முடிந்ததும் நேராக அவரிடம் சென்று ஆசி வாங்குவார்கள்... "நீ என்னவாக போகிறாய்?"என்று கேட்பார் அவர்....
அவர்கள் சொல்லும் வழி தனக்கு சரியெனப்பட்டால் அதற்கு அந்தந்த துறையில் உள்ள தன் நண்பர்கள் மூலம் ஆவண செய்வார்... வழிமாறி செல்ல நினைப்பவர்களை செல்லமாக கண்டித்து ஒரு குறிப்பிட்ட துறையை தேர்ந்தெடுக்க செய்வார்... அதிலும் அவர்கள் வெற்ற பெற உதவுவார்... அவர் சொல்லி தன் வாழ்வை அமைத்துக் கொண்டவர்கள் அனைவரும் வாழ்வில் ஜெயித்துவிடுவார்கள். பலர் பெரு வெற்றி பெற்று மிகப்பிரபலங்களாக மாறிவிட்டார்கள்.... சில சம்பவங்கள்... ...( பதிவு கொஞ்சம் விரிவாக இருக்கும்.. இதைவிட சுருக்க முடியாது. மன்னிக்க...)
1950களில் முரசொலி மாறனை படிக்க வைக்கிறார். படிப்பு முடிந்ததும் மாறன் எம்ஜிஆர் இடம் வருகிறார்.
எம்ஜிஆர் :படிச்சு முடிச்சாச்சு, அடுத்து என்ன பண்ண போறதா உத்தேசம்?
மாறன்: எனக்கு ஒரு வழியும் தெரியலை.. நீங்கதான் நல்ல வழி சொல்லனும்..
எம்ஜிஆர் :.உனக்கு நல்ல நிர்வாக திறமை இருக்கு... என் பார்வையில் உன் திறமைக்கு தொழில் துறையில புகுந்து சாதிக்கலாம்...
மாறன் : எந்த தொழில்....
எம்ஜிஆர் :உதைப்பேன் ,(தலைவர் செல்லமாக அடிக்கடி சொல்லும் வார்த்தை )அது உன் சாய்ஸ்... ஒரு வருஷம் எடுத்துக்கோ நல்லா ஆராய்ந்து உனக்கு எந்த தொழிலில் ஆர்வம், திறமை இருக்குன்னு என தெரிஞ்சுகிட்டு வந்து சொல்லு... அதுல நா என்ன உதவி செய்யமுடியுமோ செய்றேன்.
(..அந்த முரசொலி மாறன் பிற்காலத்தில் அவருடைய நிர்வாக திறமையால் கவரப்பட்டு கருணாவே தன் முரசொலி நிர்வாக தலைவர் பொறுப்பளித்ததும் இந்திய மத்திய தொழில்துறை அமைச்சர் ஆனதும் வரலாறு...அவர்தான் மேகலா பிக்சர்ஸ் தயாரிப்பாளர்... அவருக்கு தான் தலைவர் சம்பளம் வாங்காமல் "எங்கள் தங்கம்" நடித்துக் கொடுத்தார்... )
அடுத்து நான்கு ஆண்டுகள் கழித்து இளைஞன் ஒருவன் படிப்பை எம்ஜிஆர் மூலம் முடித்து ஆசீர்வாதம் வாங்க வருகிறான்.
எம்ஜிஆர் :படிப்பை நல்லபடியா முடிச்சாச்சு.. அடுத்து என்ன செய்ய உத்தேசம்...
இளைஞன்:நா சினிமாவுல புகுந்து நடிக்கப்போறேன்.
எம்ஜிஆர் :உதைப்பேன். உனக்கு சினிமா செட்டாகாது. உனக்கு கேட்பவரை கவர்ந்து இழுக்கும் நகைச்சுவையான பேச்சு திறமை இருக்கு.நல்ல பீல்டு ஒர்க்கர் நீ.. அரசியலில் நீ ஜொலிக்க அதிக வாய்ப்பு இருக்கு... நானே அதற்கு வழி செய்கிறேன்.நாளை அண்ணா விடமே நேரடியாக உன்னை அறிமுகம் செய்றேன்... (அந்த இளைஞனை அண்ணாவிடம் அறிமுகம் செய்து சிறிய பொறுப்பு வாங்கி தருகிறார். இந்த இளைஞன் தான் 9 முறை MLA 4முறை அமைச்சர் ஆன பிற்காலத்தில் எம்ஜிஆர் முதுகில் குத்திய திமுக துரைமுருகன்.)
அடுத்து 1980ல் அவரால் ஒரு பெண் படிப்பை முடித்து ஆசி வாங்க வருகிறார்.
எம்ஜிஆர் :அடுத்து என்ன செய்றதா உத்தேசம்?
பெண்: அரசியலில் உங்க கட்சியில சேர போறேன்.
எம்ஜிஆர் :உதைப்பேன்.உனக்கு அரசியல் வேண்டாம். அதுக்கேத்த கள்ளம் கபடம் உனக்கு இல்லை.. ஆழகான வட்டார வழக்கு பேச்சு நகைச்சுவை டயலாக்டெலிவரி முகபாவனை திறமை இருக்கு. சினிமாவுல நடிச்சா பெரிய ஆளா வருவ...(கையோடு பாக்யராஜ்க்கு போன் போடுறார். முந்தானை முடிச்சு படப்பிடிப்பு இருந்து பாக்யராஜ் எம்ஜிஆர் வீட்டுக்கே வந்து இந்தம்மா எதிர்காலத்தில் பெரிய நகைச்சுவை நடிகையா வரப்போறாங்க. என சொல்லி தன் படத்தில் அறிமுகப்படுத்துறார்... அந்த பெண்தான் இன்று பிரபலமான நடிகை கோவை சரளா...)
1998 திமுக ஆட்சியில் கருணாநிதி துரைமுருகன் முன்னிலையிலேயே கோவை சரளா இந்த தகவல்களை தெரிவித்து "ஒருவேளை அண்ணன் துரைமுருகன் சினிமாவிலும் நா அரசியலிலும் சேர்ந்திருந்தா இப்போ எங்க இருந்திருப்போம்னே தெரியாது. அண்ணன் துரைமுருகன் இன்றுவரை தன் முகத்தில் புல் மேக்கப் போட்டு தன் அரிதார ஆசையை தீர்த்துக்கொள்கிறார். ஆனால் தலைவர் சொன்னதால பல அரசியல் கட்சிகள் அழைத்தும் நா அரசியலுக்கே போகல"என பட்டென்று போட்டு உடைத்தார்... கருணா துரை இருவரும் குனிந்து சிரித்து கொண்டனர்....
அதே போல அவர் பேச்சை மீறி நாசமா போன வரலாறும் ஒன்று இருக்கு.... கருணா மகன் முக முத்துவையும்( ஆரம்ப காலத்தில்) எம்ஜிஆர் தான் படிக்க உதவி செய்தார்.
படிப்பு முடிந்ததும் எம்ஜிஆர் சொன்ன வார்த்தை "இவனுக்கு இன்டஸ்ட்ரியலிஸ்ட் அக வர பிரமாதமான வாய்ப்பு இருக்கு".கருணா தன் ஈகோ காரணமாக அதை புறக்கணித்து வீம்புக்கு எம்ஜிஆர் மாதிரி ஆகனும்னு சினிமாவில் நடிக்க வைத்து நாசமாக்கினார். முக முத்து குடிகாரனாக மாறிப்போனார். ஒருமுறை எம்ஜிஆர் முதல்வர் கருணா எதிர்க்கட்சி... முக முத்து அப்பாவிடம் சண்ட போட்டு எம்ஜிஆர் வீட்டுக்கு வந்துவிட்டார்... எம்ஜிஆர் அவரை சமாதானப்படுத்தி "அப்பாகிட்ட நா பேசுறேன். நாங்க எதிரியா இருக்கும் இந்த நேரத்துல நீ அப்பாவை விட்டுக்குடுத்து என்னிடம் வந்துட்டா அதை உன் அப்பனால தாங்க முடியாது.தாயும் தந்தையும் தான் முதலில் முக்கியம்"என சமாதானம் செய்து அனுப்பி வைத்தார். அப்போது கவிஞர் கண்ணதாசன் அவர்களுக்கு போன் போட்டு வேதனையுடன் எம்ஜிஆர் சொன்ன விஷயம்"லூசுப்பயல்.தன் ஈகோவை தீர்த்துக்கொள்ள தன் மகன் வாழ்க்கையை பலிகடா ஆக்கி நாசமாக்கிட்டான். அந்த அக்கா (முக முத்து தாயார்) உயிரோட இருந்திருந்தா இந்த கொடுமையெல்லாம் நடந்திருக்குமா "
ஆரம்ப காலத்தில் கருணாநிதிக்கு எம்ஜிஆர் பண உதவிகள் உட்பட பல உதவிகள் செய்தபோது முக முத்து ,முக அழகிரி இருவருக்கும் விவரம் தெரிந்த வயது. அதனாலேயே அவர்கள் எம்ஜிஆர் க்கு ஆதரவாக தன் தந்தையிடமே பலமுறை வாக்குவாதம் செய்தார்கள். அதனாலேயே கருணாநிதி இளம் வயதிலேயே இருவரையும் ஒதுக்கி வைத்தார்.கருணாநிதி பிள்ளைகளாக இருந்தாலும் இருவருமே எம்ஜிஆர் ரசிகர்களாகவே இருக்கிறார்கள். . அழகிரி இன்றும் தனது காரில் எம்ஜிஆர் பட பாடல் கேசட்டுகளை மட்டுமே வைத்திருப்பார்....
சிவாஜி இறந்த அன்று மதுக்கடை களை சென்னையில் அடைத்திருந்தனர். அடைக்கச் சொன்னது முதல்வர் கருணா... அப்போது முக முத்து செய்த அலப்பறை...
"ஏண்டா சிவாஜி செத்தா உலகமே அழிஞ்சிருச்சா?செத்தா கடைய அடைக்க இவரு என்ன பெரிய எம்ஜிஆரா? நிறைய படத்துல குடிகாரனாத்தானேடா நடிச்சிருக்காரு...கடைய தொறங்கடா டேய்"
இந்த படத்தில் எம்ஜிஆர் கையில் இருக்கும் குழந்தை கருணாநிதி மகளும் இன்றைய எம்பி யும் ஆன கனிமொழி.......... Thanks...
-
திரையுலகின் மன்னாதி மன்னன் படப்பிடிப்புக்காக வடநாடு வருகிறார் என்று கேள்விப்பட்டு நேபாள நாட்டு அரசர் தனது துணைவி அரசியுடன் மன்னனை சந்தித்து அவருடன் புகைப்படம் எடுத்துக் கொண்ட நிகழ்வு "அன்பே வா" படப்பிடிப்பில்.
அவர்களுடன் இருப்பவர்கள் ஏ.சி.திரிலோகச்சந்தர், ஏ.வி.எம். சரவணன், ஏ.வி.மெய்யப்ப செட்டியார், நேபாள அரசர், அரசி, சரோஜாதேவி மற்றும் கடைசியில் இருப்பவர் மெய்யப்ப செட்டியாரின் மனைவி ராஜேஸ்வரி அம்மாள்.
அனைவருமே நடிகப்பேரரசர் எம்ஜிஆருடன் மகிழ்ச்சியாக பகிர்ந்து கொண்ட தருணத்தை நினைத்தாலே...... Thanks...
நெஞ்சம் இனிக்கும்!
-
[வாய்ப்புகளை வாரி வழங்கிய வள்ளல்...
மயிலை வடக்கு மாடவீதியில் ஒரு திருமண மண்டபம்...
டப்பிங் கலைஞர் ஒருவரின் திருமண வரவேற்பு நிகழ்ச்சியில் மெல்லிசைக் கச்சேரி... இனிமையாகப் பாடிக் கொண்டிருந்தார் அந்த இளம் பெண் ...
'ஆண்டவன் ஒருவன் இருக்கின்றான்...' போன்ற பாடல்கள்... வித்தியாசமான குரலில் பாடிக் கொண்டிருந்தார்... ஒரே எம்.ஜி.ஆர். பாட்டு மயம்...
முன் வரிசையில் அமர்ந்து ரசித்துக் கொண்டிருந்தவர் வேறு யாருமல்ல, மக்கள் திலகம் எம்.ஜி.ஆர் !
அப்போது அவர் முதலமைச்சராக இல்லை. அ.தி.மு.க தலைவர். திரைப்படங்களில் நடித்துக் கொண்டிருக்கிறார்.
அந்த இளம் பாடகியின் தாயார் அழைத்ததின் பேரில் அந்த நிகழ்ச்சிக்கு வந்திருந்தார் மக்கள் திலகம். காரணம்...
அந்த தாய் ஒரு காலத்தில் பாய்ஸ் நாடகக் குழுவில் நடிகை! பாலமுருகன் பாய்ஸ் கம்பெனி, ஜோதி நாடக சபா என்று நடித்துக் கொண்டிருந்தவர். திருமணமான பின் நாடகத்தை விட்டு விட்டு சினிமாவில் நடித்தார். கண்ணன் என் காதலன், கணவன், என் அண்ணன், இதயக்கனி, நீரும் நெருப்பும் என்று பல எம்.ஜி.ஆர் படங்களில் சிறு சிறு வேடங்களில் நடித்திருக்கிறார். பின்பு 'டப்பிங்' கலைஞராக விளங்கினார். நாடக நடிகையாக இருந்த காலத்திலிருந்தே எம்.ஜி.ஆருக்கு அவரை நன்றாகத் தெரியும். அதனால், பழைய, புதிய
சக நாடகக் கலைஞர்கள் யார் அழைத்தாலும் அவர்களுக்கு மதிப்பளித்து, அவர்கள் அழைப்பை ஏற்று, பல்வேறு நிகழ்ச்சிகளில் கலந்து கொள்வதை கொள்கையாகவேக் கொண்டிருந்த மக்கள் திலகம், அந்த நிகழ்ச்சியிலும் கலந்து கொண்டிருந்தார்.
படப்பிடிப்பின்போது அந்தப் பெண் தனது தாயாருடன் வருவதை எம்.ஜி.ஆர் பலமுறை பார்த்திருக்கிறார்.
ஆனால், அவர் இந்த அளவுக்குப் பாடுவார் என்று எதிர்பார்க்கவில்லை.
இந்த செய்திகளையெல்லாம் நான் அறிந்துகொள்ள உதவியாக இருந்த அந்த பாடகியின் பேட்டியிலிருந்து ஓரு பகுதி...
" மக்கள் திலகம் எம்.ஜி.ஆர் மாதிரி ஒரு இசை ரசிகரைப் பார்க்க முடியாது. அந்தக் கல்யாணத்தில் என் கச்சேரியை நீண்ட நேரம் அமர்ந்து ரசித்தவர், ‘‘உனக்கு இப்படி பாடக்கூடிய பொண்ணு இருக்குன்னு சொல்லவே இல்லையே’’ என்றார் அம்மாவிடம். அப்படியே கத்தையாகப் பணத்தை அள்ளிக் கொடுத்து வாழ்த்தினார். அப்போ எனக்கு 15 வயசுதான் இருக்கும்.
அவருடைய பாராட்டையே விருதாக நினைத்த எனக்கு, வரம் போல இன்னொரு வாய்ப்பையும் கொடுத்தார். ‘பல்லாண்டு வாழ்க’ படத்தில் ஒரு பாடலைப் பாட திரையிசைத் திலகம் கே.வி.மகாதேவனிடம் சிபாரிசு செய்தார் எம்.ஜி.ஆர். கே.வி.மகாதேவன் இசையில் ஜேசுதாஸுடன் சேர்ந்து பாடிய,
கவிஞர் நா.காமராசன் இயற்றிய அந்தப் பாடல்தான், ‘போய்வா நதி அலையே...’....
இப்போது தெரிந்திருக்குமே அந்தப் பாடகி யாரென்று ! அவர்தான் பாடகி டி.கே.கலா. அகத்தியர் திரைப்படத்தில் 'தாயிற்சிறந்த கோவிலும் இல்லை...' என்ற பாடலை குன்னக்குடி வைத்தியநாதன் இசையில் பாடி, முதல் பாட்டிலேயே பலரது கவனத்தையும் கவர்ந்தவர். அவரது தாயார்
நாடக மற்றும் திரைப்பட நடிகையாக, டப்பிங் கலைஞராக விளங்கிய
காலஞ்சென்ற சண்முகசுந்தரி.
ரெக்கார்டிங் முடிந்ததும் கே.வி.மகாதேவன், ‘‘இதுவரை இப்படி ஒரு குரலை நான் கேட்டதில்லை. உனக்கு தனித்துவமான வாய்ஸ்’’ என்று டி.கே.கலாவை வாழ்த்தினாராம்.
அந்த பேட்டியில் மேலும் தொடர்கிறார் டி.கே.கலா......... Thanks...
-
ஹிந்து தமிழ் திசை...23-04-2020...’மறுபடியும் முதல்லேருந்தா...’ எம்ஜிஆர் பட டயலாக்! அங்கே என்.டி.ஆர் - ராமுடு பீமுடு’; இங்கே எம்.ஜி.ஆர். - எவர்கிரீன் "எங்கவீட்டுபிள்ளை"
இங்கிருந்து ஆந்திராவுக்கும் ஆந்திரத்தில் இருந்து இங்கேயுமாக வந்தவர்களும் இருக்கிறார்கள். வந்து ஜெயித்தவர்களும் இருக்கிறார்கள். அதேபோல் வந்த படமும் உண்டு. வந்து வெற்றிப் படமாக அமைந்ததும் இருக்கிறது. அந்த வகையில்... எங்க வீட்டுப்பிள்ளை, தனி ரகம். காரணம், படம் பார்த்த பலரும் எங்க வீட்டுப்பிள்ளை என்றே எம்ஜிஆரைக் கொண்டாடினார்கள். எம்ஜிஆரை சூப்பர் ஸ்டாராக்கிய படங்களில், இந்தப் படத்துக்கும் மிக முக்கியப் பங்கு உண்டு!
1965ம் ஆண்டு ஜனவரி 14ம் தேதி, பொங்கலன்று ரிலீஸான இந்தப் படம், எம்ஜிஆர் ரசிகர்களுக்குத் தீபாவளிக் கொண்டாட்டமாகவே அமைந்தது. ‘ராமுடுபீமுடு’ என்று தெலுங்கில் வந்த படத்தை, தமிழில் எடுக்க முடிவு செய்த விஜயா புரொடக்*ஷன்ஸ், எந்த டிஸ்கஷனும் இல்லாமல் இவர்தான் ஹீரோ என்று எம்ஜிஆரை டிக் அடித்தது. படத்தைப் பற்றி அறிந்துவைத்திருந்த எம்ஜிஆர், டபுள் ஓகே சொல்ல, பிரமாண்டமான முறையில் ஆரம்பமானது படம்.
அப்புறம் ஒரு விஷயம்... அந்த தெலுங்குப் படமான ‘ராமுடுபீமுடு’ செம ஹிட்டு. படம் பார்த்துவிட்டு, வணக்கம் போட்டதும் வெளியே வந்த கையுடன், அப்படியே க்யூவில் நின்று, டிக்கெட் வாங்கிப் பார்த்த ரசிகர்கள் எக்கச்சக்கம். அப்படியொரு வெற்றியைத் தந்த இந்தப் படத்தின் நாயகன் என்டிஆர் என்று சொல்லாமலேயே தெரிந்திருக்குமே உங்களுக்கு?
ராமுடுபீமுடுவை ரசித்துக் கொண்டாடியவர்கள்தான், பின்னாளில் என்டிஆரை கிருஷ்ண பரமாத்மாவாகவே பார்த்துச் சிலிர்த்தார்கள். அதேபோல், இங்கே, எங்கவீட்டுபிள்ளை எம்ஜிஆரை, அவர்கள் வீட்டுப் பிள்ளையாகவே சிகப்புக் கம்பளம் விரித்து வரவேற்று ஆராதித்தார்கள்.
இப்போது கூட, தமிழ் சினிமாவில் ஏதேனும் டபுள் ஆக்ட் படங்களில், ‘என்னய்யா எங்கவீட்டுபிள்ளை மாதிரில்ல இருக்கு’ என்று ஜாலியாய் அவர்களே படத்தில் கமெண்ட் டயலாக் வைத்திருப்பதைப் பார்க்கலாம்.
படம் வருவதற்கு முன்பே எம்ஜிஆர் ரசிகர்கள் பேசிப்பேசி மகிழ்ந்து திளைத்தார்கள். நாடோடி மன்னன் படத்துக்குப் பிறகு, ஏழு வருடங்கள் கழித்து, அடுத்த இரட்டைவேடப் படமாக எங்கவீட்டுப்பிள்ளை அமைந்ததுதான் காரணம்.
விஜயா கம்பைன்ஸ் புரொடக்*ஷன்ஸ் நாகிரெட்டி - சக்ரபாணி தயாரித்த ஈஸ்ட்மென் கலர் படம் இது. மிகப் பிரமாண்டமான முறையில் எடுத்திருந்தார்கள். வீடுகள் செட்டெல்லாம் அவ்வளவு கலைநயத்துடன் உருவாக்கப்பட்டிருந்தது.
‘டபுள் ஆக்ட்டு. ஆள் மாறாட்டக் கதைதானே...’ என்று ஒற்றைவரியில் சொன்னீர்களென்றால், உம்மாச்சி வந்து உங்கள் கண்களைக் குத்தும். அப்படியெல்லாம் சர்வசாதாரணமாக டீல் செய்து சொல்லிவிடமுடியாதபடி நரஸராஜூவின் மூலக்கதையும் இருக்கும். அதை அதி அற்புதமாக, தெளிவாகத் திரைக்கதையும் ஆக்கியிருப்பார்கள்.
இன்னும் சொல்லப்போனால், எம்ஜிஆருக்கே இது புதுமாதிரியான படம்தான். காரணம்... அப்பாவி எம்ஜிஆர், தமிழ் சினிமாவுக்கும் புதுசு. ரசிகர்களுக்கும் விருந்து. அந்த அப்பாவி முகம் கொண்ட எம்ஜிஆரைப் பார்த்துக்கொண்டே இருக்கலாம். அவ்வளவு பாந்தமாக இருக்கும், அந்தக் கேரக்டர்.
அத்தனை சொத்துக்களுக்கும் அதிபதி அப்பாவி எம்ஜிஆர். ஆனால், மாமா நம்பியாரின் பிடியில் சொத்தும் இருக்கும். அவரும் இருப்பார். மிரட்டலான பேச்சு, உருட்டலான பார்வை, விளாசித்தள்ளும் சாட்டையைக் கொண்டு, எம்ஜிஆரை பம்பரமாக்கியிருப்பார் நம்பியார்.
அங்கே இன்னொரு எம்ஜிஆர். நாகேஷுடன் சுதந்திரமாகச் சுற்றித் திரிந்துகொண்டு, நடிக்க முயற்சி செய்துகொண்டு, ஜாலியாகப் பொழுதைக் கழிப்பார். அப்பாவி பெயர் ராமு. இவரின் பெயர் இளங்கோ.
ராமு எம்ஜிஆருக்கு ஒருகட்டத்தில் செத்துவிடலாம் என்று நினைத்து முயற்சி செய்ய, அக்காவின் மகளான சிறுமி தடுத்துவிடுவாள். அடியும் உதையும் வாங்கிக்கொண்டு இங்கே இருக்கமுடியாது என்று வீட்டை விட்டே, ஊரை விட்டே கிளம்பிவிடுவார் ராமு.
இதற்கிடையே செல்வந்தரான எஸ்.வி.ரங்காராவின் மகள் சரோஜாதேவியை அப்பாவி ராமுவிற்கு மணமுடித்து, வரதட்சணைப் பணமும் பெற்றுவிடத் திட்டம் போட்டிருப்பார் நம்பியார்.
ஒருவழியாக, ராமு எம்ஜிஆர், இளங்கோ எம்ஜிஆரின் கிராமத்துக்குச் சென்று அவரின் வீட்டுக்குச் செல்ல, இங்கே இளங்கோ எம்ஜிஆர், சரோஜாதேவியின் கண்ணில் பட்டு, வீட்டுக்கு அழைத்துச் செல்ல, அங்கே நம்பியார் வந்து, அவரை அழைத்துச் சென்றுவிட... அப்புறமென்ன? அப்புறம் என்ன... என்பதுதான் படத்தின் ஆகச்சிறந்த சுவாரஸ்யங்கள்.
கிராமத்தில் இளங்கோ எம்ஜிஆரின் முறைப்பெண் ரத்னா. ராமு எம்ஜிஆருக்குப் பார்த்த சரோஜாதேவி. இப்படி ஆள்மாறாட்டக் கதையில், காதலும் இடம் மாறும். அந்தக் காதலால் குழப்பமும் பிரிவும் சோகமும் வரும். ஆனால் படம் முழுக்க எல்லாமே இருந்தாலும் சோகத்தை சட்சட்டென்று நல்ல மூடுக்குக் கொண்டு வந்துவிடுகிற திரைக்கதையைக் கையாண்டார்கள்.
வீட்டில் அடைபட்டிருந்த வீரன் எம்ஜிஆர், ஹோட்டலுக்குச் சென்று இட்லி, தோசை, ஊத்தப்பம் என்று ஃபுல்கட்டு கட்டிவிட்டு, பில் தராமல் வெளியேறிவிடுவார். அதேநேரம், அதே டேபிளுக்கு அப்பாவி எம்ஜிஆர் வந்து உட்காருவார். சர்வர், வேறென்ன வேணும் என எரிச்சலாகக் கேட்பார். ரெண்டு இட்லி என்றதும் மறுபடியும் முதல்லேருந்தா என்பார் சர்வர். இந்த மறுபடியும் முதல்லேருந்தா... என்பது ஞாபகம் இருக்குதானே!
சரோஜாதேவி ஒரு பக்கம் வர, இன்னொரு பக்கத்தில் ரெண்டு எம்ஜிஆரும் இருப்பார்கள். சரோஜாதேவியின் ஹேண்ட்பேக்கை ஒருவன் தூக்கிக்கொண்டு ஓட, திருடன் திருடன் என்று கத்துவார். உடனே வீர எம்ஜிஆர், திருடனை நோக்கி ஓடுவார். இது வழக்கமான சீன். ஆனால் திருடன் என்றதும் அப்பாவி எம்ஜிஆர் தன் பர்ஸை பத்திரப்படுத்திக்கொண்டு, அங்கிருந்து ஓடுவார். சின்னக்காட்சிதான். ஆனாலும் அத்தனை நகாசு காட்டியிருப்பார்கள்.
இப்படி படம் நெடுக, அங்கங்கே காட்சிகளாலும் வசனங்களாலும் நம்மை ரொம்பவே ஈர்த்திருப்பார்கள். படத்துக்கு வசனம் எழுதிய சக்தி கிருஷ்ணசாமியின் வசனங்கள் ஒவ்வொன்றுமே ஷார்ப். அதிலும் நாகேஷ் உளறுவாயனாக அடிக்கும் லூட்டிக்கு அளவே இல்லை. ‘என்னண்ணே... அவங்களைக் கடிச்சிட்டே... ச்சீ... அடிச்சிட்டே’, ‘தப்பு பண்ணிட்டோம். நீங்கதான் துரத்தணும்... சாரி திருத்தணும்’, ‘அண்ணே, அவங்க காலை ஒடி சீச்சீ காலைப் புடி’, ‘டைரக்டர் சார், எனக்கொரு டான்ஸ் கொடுங்க சார். மன்னிக்கணும் சான்ஸ் கொடுங்க சார்’ என்று படம் முழுவதும் நாகேஷ் இப்படியேதான் பேசுவார்.
சரோஜாதேவியை இன்னும் அழகாகவும் எம்ஜிஆரை இன்னும் இன்னும் அழகாகவும் மொத்தப் படத்தை அழகுக்கு அழகாகவும் வின்சென்ட் - சுந்தரத்தின் ஒளிப்பதிவு மெருகேற்றிக்கொண்டே இருக்கும்.ன்விஸ்வநாதன் ராமமூர்த்தியின் மெட்டுகள் அள்ளிக்கொண்டு போகும். பாடலின் உள்ளூடாக வரிகிற இசைகளும் அமர்க்களப்படுத்தும். பின்னணி இசையும் பிரமாதம்.
கண்களும் காவடிச் சிந்தாகட்டும்
காளையர் நெஞ்சத்தைப் பந்தாடட்டும் பாட்டு ஸ்டேஜ் டான்ஸ். அதற்கேற்றாற்போல டியூன் போட்டிருப்பார். எல்.ஆர்.ஈஸ்வரியின் குரல், நம்மையும் ஆடவைக்கும்.
குமரிப்பெண்ணின் உள்ளத்திலே
குடியிருக்க நான் வரலாமா பாட்டு, செம லவ் ஸாங்.
அதேபோல,
நான் மாந்தோப்பில் நின்றிருந்தேன்
அவன் மாம்பழம் வேண்டும் என்றான் பாடல், கிராமத்துச் சங்கதிகளைச் சேர்த்துக் கட்டிய அந்தக் காலத்து குத்துப்பாட்டு. எம்ஜிஆரும் ரத்னாவும் பிரமாதம் பண்ணியிருப்பார்கள்.
‘பெண் போனாள்... இந்தப் பெண் போனாள்
இவள் பின்னாலே என் கண் போகும்’ என்ற டூயட் பாடலுக்கு டிரிபிள் பேங்கோஸில் பின்னிப்பெடலெடுத்திருப்பார்.
‘மலருக்குத் தென்றல் பகையானால் என்றொரு சோகப்பாடல். இங்கே சரோஜாதேவியும் அங்கே ரத்னாவுமாகப் பாடுவார்கள். பொதுவாக, பரபரவென போய்க்கொண்டிருக்கும் படத்துக்கு இப்படி சோகப்பாட்டு முட்டுக்கட்டை போடும் என்பார்கள். ஆனால் அப்படி எந்தச் சேதாரமும் நிகழாதபடி, பாடலையும் அமைத்திருப்பார்கள். கில்லாடித்தனமான எடிட்டிங்.
படத்திலும் எம்ஜிஆரின் திரையுலக மற்றும் அரசியலிலும் முக்கியப்பங்கு வகித்த ‘நான் ஆணையிட்டால்’ பாட்டுதான் படத்துக்கே ஹைலைட். பாட்டு ஆரம்பிக்கும் முன்பிருந்தே ஆரம்பித்துவிடுகிற கைத்தட்டல், பாட்டு முடிந்தும் கூட ஓயாதிருப்பதுதான் எம்ஜிஆருக்கும் நம்பியாருக்கும் அந்தச் சவுக்குக்கும் கிடைத்த மெகா வெற்றி. முக்கியமாக, கவிஞர் வாலிக்குமான வெற்றி இது.
ரங்காராவ், நம்பியார், தங்கவேலு, பண்டரிபாய் என பலரும் அருமையான நடிப்பை வெளிப்படுத்தியிருப்பார்கள். முக்கியமாக, படம் நெடுக, நாகேஷ் தப்புத்தப்பாகச் சொல்லும் ஒற்றை வரிகள், சரவெடிக் காமெடி.
இந்த எம்ஜிஆரும் அந்த எம்ஜிஆரும் அண்ணன் தம்பி என்கிற முடிச்சு அவிழ்வதும் நம்பியாரை வெளுத்தெடுப்பதும் பண்டரிபாய் அக்கா என அறிந்து உருகுவதும் என கடைசி இருபது நிமிடங்கள் சூப்பர் ஃபாஸ்ட் எக்ஸ்பிரஸ் வேகத்தில் போய், சுபம் கார்டுடன் முடியும்.
ஆனால் எம்ஜிஆரின் அடுத்தடுத்த இன்னிங்ஸ் அங்கிருந்துதான் ஆரம்பமானது. அங்கிருந்தும் ஆரம்பமானது.
மனசில் வலியோ வேதனையோ, துக்கமோ வருத்தமோ... ஏதேனும் ஓர் சூழ்நிலையில் கொஞ்சம் டல்லாக இருக்கும் போது, எங்க வீட்டு பிள்ளையைப் பாருங்கள். டல்லான மனசு எம்ஜிஆர் மாதிரியே சுறுசுறுவென ஆகிவிடும். ஏதோவொரு உற்சாகம் தொற்றிக்கொள்ளும். அதுதான் எம்ஜிஆர் ஃபார்முலா.
65ம் வருடம் வெளியான படம். 55 வருடங்களாகிவிட்ட படம். ஆனால், இறந்தும் வாழ்ந்து கொண்டிருக்கிற எம்ஜிஆரைப் போலவே, ’எங்கவீட்டுபிள்ளை’யும் நீடூழி வாழ்வான்....... Thanks.........
-
-
-