Originally Posted by saradhaa_sn
ராமண்ணா மிகுந்த சிரமத்துக்கிடையேதான் இப்படத்தை வெளிக்கொணர்ந்தார். இறுதியில் ரீ-ரிக்கார்டிங் செய்வதற்குக்கூட வசதியின்றி, மெல்லிசை மன்னரின் அனுமதியுடன் அவர் முன்னர் பல்வேறு படங்களுக்கு அமைத்திருந்த பின்னணி இசையை அப்படியே பயன்படுத்திக்கொண்டார். டைட்டில் மியூசிக் சொர்க்கம் படத்தினுடையது அப்படியே பயன்படுத்தப் பட்டிருந்தது. நடிகர்திலகத்தை அறிமுகப்படுத்தும் மியூசிக், ஊட்டிவரை உறவு படத்தில் நாகேஷ், கடையொன்றில் ஒரு ஆங்கிலோ இந்தியப்பெண்ணின் பார்சலில் இருந்து 'காணவில்லை' விளம்பரத்தைக் கிழிக்க முற்படும்போது வாசிக்கப்பட்ட இசை. இப்படி பல்வேறு படங்களில் இருந்து பொருத்தமாக இணைத்திருந்தார். (சொன்னால்தான் மற்றவர்களுக்கே தெரியும். மற்றபடி இப்படத்துக்காகவே அமைக்கப்பட்ட ரீரிக்கார்டிங் போலவே இருக்கும்). நடிகர்திலகத்தின் காட்சிகள் எல்லாம் வெகுநாட்களுக்கு முன்பே முடிக்கப்பட்டிருந்தபோதிலும், தயாரிப்பாளரின் வேறு பல காரணங்களால் படம் தாமதப்பட்டது. நடிகர்திலகம் நடித்த ஒன்றிரண்டு சிறிய காட்சிகள் மட்டும் கடைசியில் எடுக்கப்பட்டு இணைக்கப்பட்டன. பள்ளியின் 'பெற்றோர் தின விழாவுக்கு' சேகரின் குழந்தைகள் சுந்தரமூர்த்தியை அழைக்கும் காட்சியும், மாடியிலிருந்து உருண்டுவிழும் பெண் குழந்தையை சுந்தரமூர்த்தி தூக்கும் காட்சியும் கடைசியில் எடுக்கப்பட்டன. (இந்தக்காட்சியில்கூட நடிகர்திலகத்தின் சட்டை, தோள்பட்டையில் கிழிந்திருக்கும். அதைக்கூட கவனிக்காமல் எடுத்திருப்பார் ராமண்ணா).