-
தூசு..
கண்ணைக் கசக்க
அருகில் வந்து இமை பிரித்து
ஊதினான்..
இப்போ பரவாயில்லை..
விலகி வெளிறி சிரித்தாள்..
கைகளில் படபடத்தன
விவாகரத்துக் காகிதங்கள்..
மறுபடி எப்போ..
நா ரெண்டு நாளில்
சிங்கப்பூர் போறேன்..
கொஞ்ச நாள் பழசை மறந்து..
புது வேலை..புது நாடு..
நீ இங்கு தானே..
விதியிருந்தால் பார்க்கலாம்..
கையசைத்துச் சென்றபிறகு
தூசில்லாமலே
மறுபடி கலங்கின..
-
கலங்கின நினைவுகள்
கலைந்தன கனவுகள்
விலகின திரைகள்
விழித்தன கண்கள்
நீண்டன நிழல்கள்
அந்திம பொழுதுகள்
-
பொழுதுகள் இன்பமாய்த் தான் கழிந்தன..
மன்னி நீட்டி முழக்கிச் சொன்ன
ஊர்வம்பு..
“பக்கத்து வீட்டு சித்ரா லவ்மேரேஜ் தெரியுமா..
கோடி வீட்டு கோமு மாமியோட
கடைசிப் பையன் இஞ்சினியரிங்க் சேர்ந்துருக்கான்
எதிர் வீட்டுல லொக் லொக்னு
இருமுவாரே சுருட்டு மாமா..
அவர் போன டிசம்பர்ல போயாச்சு..
அது சரி..
எக்ஸர்ஸைஸ் பண்றயோன்னோ..
நானும் மூணாவது வீட்டு கீதாவும்
காலைல வாக் போறோம் தெரியுமில்ல..”
தெரிந்த சில நண்பர்கள்,
சொந்தங்கள் எல்லாம்
கொஞ்சம் தொப்பை, கொஞ்சம் காதோர நரையுடன்...
சில சின்னப் பெண்கள் எல்லாம்
நெடுநெடுவென வளர்ந்து நின்று
புன்சிரித்துப் போயின..
அண்ணா வழக்கம் போல்
எவ்வளவு பேங்க் பேலன்ஸ்
எங்கெங்கே இன்வெஸ்ட் பண்ணியிருக்கே
திருநகர்ல ஒரு வீடு வர்றது பார்க்கட்டா..
என பேச்சுக்கள் ஆலோசனைகள்..
இவளது வீட்டிற்கே சென்று
அரட்டை அடித்து, பர்மிஷன் வாங்கி
சினிமா கோவில் என
சுற்றியாகி விட்ட்து..
எல்லாம் முடிந்து
கிளம்பும் போது
விமான நிலையத்தில்
இவளது கண்ணோர நீர்த்துளி;
தொக்கி நிற்கும்
எப்போ கூட்டிட்டுப் போகப்போறே – கேள்வி
கண்ட பிறகு
அது மட்டும் நினைவில்...
-
நினைவில் நிற்குது பழைய செய்யுள் வரிகள்
பால்ய வயதில் நடந்த ஆயிரம் சம்பவங்கள்
பழகிய பல்வேறு முகங்கள் குரல்கள் இடங்கள்
மறந்து போகுதே நேற்று கேட்டது பார்த்தது
-
பார்த்ததும்
கொஞ்சத் தான் தோன்றீயது..
கொழுகொழு கன்னமும்..
திருஷ்டிப் பொட்டும்,
துறுதுறு கண்களும்
அலைபாயும் முடிக்கற்றையும்...
இருகை நீட்டி
வா என அழைத்தால்
முகம் திருப்பிக் கொண்ட்து..
வைத்திருந்த சுரிதார் இளம்பெண் சிரித்து
“அண்ணா கிட்ட போடா’
”இது....”
“என் அக்காவின் குழந்தை!”
மனதுக்குள் ஏனோ நிம்மதி பரவ
இப்பொழுதும்
கொஞ்சத்தான் தோன்றியது....!
-
தோன்றியது என்னவோ சொர்க்கபூமியாகத்தான்
வனங்களும் வளங்களும் பொங்கி வழிந்தோட
நீரும் நிலமும் கடலும் மலையும் உயிர்களுமாய்
ஆதாமும் ஏவாளும் பல கோடியாய் பெருகிய பின்
ஆணவமும் சுயநலமும் பெருக கேடுகளும் பெருக
இயற்கையோடு இயைந்து வாழாத மனிதன் இன்று
ஞானக்குருடனாய் அழிகிறான் அடக்கியாழ நினைத்த
அந்த அரிய சக்திகள் அடங்காமல் சீறி எழுவதனால்
-
எழுவதானால் முடியுமா..
யோசிக்கவே செய்யாதே
எழுந்திரு... மெல்ல பிடித்துக்கொண்டு நட..
விபத்தில் காலெலும்பு முறிவது சகஜம்..
சரிசெய்யத் தான் நாங்கள் இருக்கிறோம்..
இருமாதங்கள் ஆகிவிட்ட்தே..
நடவுங்கள்...
டாக்டர் மென்மையாகச் சொன்னார்..
சாரே இந்தா தொடு..
கூச்சப்படாண்டா..
மெல்ல நடங்கோ..
மலையாள இள ம்யில் தாதி
கை நீட்ட
ம்ஹீம்.. முடியவில்லை..
வலி...
அப்படித்தான் கொஞ்சம் வலி இருக்கும்..
எங்கே முகத்தைப் பாரும்.. சிரியும்..பின் நடவும்..
உம்மால் முடியும்...
நர்ஸ் கொஞ்சம் கோணலாய் வைத்து
வேடிக்கை காட்ட
மறுபடி முயன்றதில்
வலி இருந்தாலும்
கூடியிருந்த்து தன்னம்பிக்கை..
-
தன்னம்பிக்கை தருமே
தடை வெல்லும் வேகம்
தணியாததோர் உற்சாகம்
திருவினையாக்கும் ஆக்கம்
துணையாய் கையிலிருக்க
துவழ்வதோ தடுமாறுவதோ
தோணியின் துடுப்பாயிருக்க
தொடுவானம் கூட தூரமோ
-
தூரம் அதிகமில்லை...
அந்தப் பக்க சாலையில் தான் நிற்கிறாள்..
கொஞ்சம் இளைத்திருக்கிறாள்..
முகம் வாடியிருக்கிறது...
துள்ளூம் கண்கள் சோர்வாய்..ஏக்கமாய்..
எப்படி இருக்கிறாள்
புதுவாழ்க்கை எப்படி...
கேட்டு விடலாமா..
ஆமாம் போய்க் கேள்... – மனது..
உனக்கு அறிவிருக்கிறதா...
வெட்டிய நகம்போல..
காலிச் சுண்டல் பொட்டலத்தைப் போல..
அலட்சியமாய் உன்னை....
.போகாதே –புத்தி..
என்ன செய்யலாம்
கொஞ்சம் புகைவிட..
போய்ப்பார்க்கிறேனே..
உனக்கென்ன தெரியும் என் நேசம் பற்றி..
என் மனதுக்குத் தான் தெரியும்..
அறிவு கெட்ட்வனே போகாதே...
ஒருவழியாய் வாதம் செய்து
குறுக்கே வாகனங்கள் செல்லக்
காத்திருந்து
கடக்க முற்பட்டால்..
எங்கிருந்தோ வந்த
மூன்று சக்கர வாகனத்தில்
ஏறிச் சென்றாள் அவள்....
-
அவள் பைத்தியமாகிப் போனாளே
புத்தியை முழுதாய் தொலைத்தாளே
பற்றை விட வேண்டிய வயதிலே
பற்றிக்கொண்டாளே போதை ஒன்றை
பழுதென்றால் தடங்கலென்றால்
பொழுது போகாமல் தவிப்பாளே
பறி கொடுத்த நிலை கொள்வாளே
புது யுக வசியம் இந்த இணையமே
-
இணையமே..
நீயும் ஒரு பெண்ணைப் போல..
உனக்குப் புரியாத விஷயமில்லை..
தெரியாத விஷயமில்லை..
ஆனால் கேட்டாலொழிய சொல்ல மாட்டாய்..
சமயங்களில் கோபித்துக் கொண்டு
பிழை எனச் சொல்வாய்...
விவாதம் செய்வதற்கும் உன்னிடம் முடியும்
ஆன்மீகமும் உன்னிடம் உண்டு..
இதர கவர்ச்சிகளும் உண்டு..
தொலைத் தொடர்புகளை
நெருங்க வைத்தவள் நீ
எங்கோ நடப்பதை அறியவைத்தவள் நீ..
இருந்தாலும்...
மெல்ல மெல்ல உன்னிடம்
அடிமையாவது என்பது
கொஞ்சம் நெருடலாக...
-
நெருடலாக உறுத்திடும்
பல்லுக்குள் துணுக்காக
சாதத்தில் சிறு கல்லாக
கண்ணியமாய் பேசும் கனவான்
பார்வையில் ஒரு கள்ளம்
பூடகமாய் வரும் எகத்தாளம்
பெண்ணே தேவை எச்சரிக்கை
-
எச்சரிக்கை அறியாது வாழ்வானும் உண்டு
எச்சரிக்கையாய் வீழ்வானும் உண்டு.
-
கிறுக்கன்
-
உண்டு உண்மை என்று ஒன்று
ஓரமாய் அது நின்று கொண்டு
ஊமையாய் வேடிக்கை பார்க்க
வேடம் பூண்டு பொய்யதுவும்
பலரும் பார்க்க ஆட்டம் காட்டி
பாய்ந்து ஆடி ஓய்ந்த வேளை
பொல பொலவென விடியும்
-
விடியும் இன்னும் சற்றுப் பொழுதில்...
விழிகளில் உறக்கம் இனிமேல் வாரா..
எழுந்து சென்று கண்ணை இடுக்கி
நேரம் பார்த்தால் அட்டா ஜாஸ்தி
உறங்கி விட்டேனே எங்கே பையன்
இழுத்துப் போர்த்தித் தூங்கு கின்றான்..
சின்ன வயதில் எத்தனை கஷ்டம்..
பத்து வருடம் முன்னால் இவனின்
அம்மா போனாள் காய்ச்சலில் மேலே..
நானும் கொஞ்சம் அலைந்து திரிந்து
பற்பல வேலை பார்த்துக் கொண்டு
பள்ளியில் இவனைச் சேர்த்து விட்டேன்..
ம்ம்.. அவனும் நன்றாய்ப் படிக்கிறான்....
இப்போ கூட விடுமுறை ஆனால்
டீக்கடை ஒன்றில் வேலை செய்கிறான்...
எனக்கு உதவி செய்ய வேண்டுமாம்..
வேண்டாம் என்றால் விட்டால் தானே..
***
பள்ளியில் இவனும் பரிசாய் வாங்கிய
சைக்கிள் நிக்குது வெளியில் – அருகில்
என்னைப் போலவே பழைய என்சைக்கிள்..
அதனை எடுத்துப் பூட்டைத் திறந்து
ஏறி அமர்ந்து மெல்ல மிதித்தால்..
இருளோ இன்னும் விலகா திருக்க
பாலம் கொஞ்சம் இருபது நிமிடம்..
இந்த நேரம் வேன் வந்திருக்கும்..
சென்றால் ஐம்பது பேப்பர் எடுத்து
ஐந்தரை மணிக்குள் அருகில் உள்ள
நகரில் சென்று போட்டிட வேண்டும்..
மறுபடி பாலம்.. ஐம்பது பேப்பர்
மறுபடி கொஞ்சம் ஃப்ளாட்கள்; எல்லாம்
போட்டு முடிக்க ஏழும்ணி ஆகும்
பின்னர் வீடு குளித்துக் கிளம்பி
ஒருமணித் தொலைவில் இருக்கும் ஹோட்டலில்
வேலை செய்து மீண்டும் வரத்தான்
இரவு எட்டு மணிதான் ஆகும்...
பின்னர் தூக்கம் பின்னர் வேலை...
பொழுதும் போகுது வயதும் போகுது...
**
பாலம் வந்திட பேப்பர் எடுக்கும்
கூட்டமும் இருக்க பேசி எடுத்துப்
பிரித்து வண்டியில் வைத்துக் கட்டி
நிமிர்ந்தால் அட்டே நம்ம பையன்..
என்னடா என்றால் அப்பா இன்னிக்கு
தேர்வு முடிவு அதனால் வந்தேன்...
பேப்பர் கொடுத்து ஆர்வம் பொங்க
பையன் முகத்தைப் பார்த்தால் அவனும்
அப்பா என்றே பேப்பர் காட்ட
சிறிய அளவில் அவனின் போட்டோ..
பெரிய எழுத்தில் மாநில முதல் என..
கண்ணைத் துடைத்து அவனைக் கட்டி
விடிநத்து நமக்குடா என்றே சொல்லி
வானம் பார்த்தால் அங்கும் அப்படி....
****
-
அப்படி ஒரு கனவு
எப்படி வந்ததெனக்கு
இப்படி ஒரு மலைப்பு
மறுபடி வ்ருமா நேற்று
பழகிய பழைய வீடு
பசுமையான நினைவு
நாடோடியாய் ஓடிய நதி
நெருங்கிவிட்டது கடலை
-
”கடலைப்
பல இடங்களில் பார்த்திருக்கிறேன்...
ரசித்திருக்கிறேன்..
கோவளம் கடற்கரையில்
பகற்பொழுதில்
பருவப் பெண்ணைப் போல
சற்று அமைதியாய் இருக்கும் அலைகள்.....
திருச்செந்தூரில்
இரவுப் பொழுதில்
கருநீல நிறத்தில்
கோபம் கொண்ட பெண்ணாய்ச் சீறும்..
ஃப்யுஜைராவில் கொஞ்சம்
அடர்நீலத்தில்
கரையருகில் நின்றால்.
என்னைக் கொஞ்சேன் என்பதுபோல்அலைகள்
மென்மையாய்த் தொட்டுச் செல்லும்..
மஸ்கட்டில் காந்தாப் கடற்கரையில்
வெளிர்நீலத்தில் சிரிக்கும்..
அங்கேயே பாரல் ஹச்முக் என்ற இட்த்தில்
கடலைப் பார்த்தால்
வெண்மை மணலில்
பல நீலங்கள் ஒன்று கூடிப்
பரவசப் படுத்தும்..
அரை நிலா கடற்கரை சென்ற போது
அங்கு உள்ள் கடலும்
மெல்லக் குளிரவைக்கும் காற்றும்
இப்போது நினைத்தாலும்
சிலிர்க்கிற்து...
பார்த்துச் சலிக்காத விஷயங்கள்
உலகத்தில் இரண்டு உண்டு
ஒன்று நீ..மற்ற்து கடல்...
கடலை விட ஆழமான ஒன்றை
இன்று கண்டேன்...”
“அச்ச்ச்சோ...
என் கண்கள் எனப்போகிறாயா..:”
சிரித்தாள்
”கடலைப் பற்றி நீ சொன்னதை விட
நீ போடும் கடலை
எனக்குப் பிடித்திருக்கிறது..
ஆளை விடு சாமி..”
கை பிடித்து நிறுத்தினேன்..
“நான் சொன்னது
எப்பொழுதும்
சிரித்து மழுப்பி
பதிலேதும் சொல்லாமல்
நழுவிச் செல்லும்
உன் மனம்”
*****
-
மனம் இப்படி துவழுமா
சோகக் கடலில் மூழ்குமா
நிலை கொள்ளாது தவிக்குமா
தரையில் மீனாய் துள்ளுமா
கண் துயிலாது வெம்புமா
கருகிப் போகுது பயிரு
தொக்கி நிக்குது கவிதை
காத்துக்கிடக்கு மெயிலு
தொங்கிப்போகுது தொடர்பு
தொலைத்தொடர்பே காப்பாத்து
தொல்லை தீராத அலையா
திரிசங்கு சொர்க்கம் எனதா
-
எனதா இல்லை உனதா
ஓ இல்லை இருவருடைய்தும் தான்..
விட்டுக் கொடுக்கட்டுமா உனக்கு
இல்லை
கொஞ்சம் பார்த்து விட்டுக்கொடு
உன் இஷ்டம்..
போட்டி போட்ட்டுமா
ஆமாம் அவசியம்..
உன்னுடன் ஒத்துத் தான் போகணுமா..
என்னம்மா கண்ணு..
அப்படித் தான் இருக்கணும்..
உன்னை விட நன்றாகச் செய்தால்
உனக்குக் கோபம் வராதா..
வருமே..
ஆனா.ல் நானும் நன்றாகச் செய்வேன்..
இதோ பார்..
உன்னை முழுதும் எனக்குத் தெரியாது..
எனக்கு உன் அழகு முக்கியமில்லை..
உனக்கு மட்டுமில்லை..எனக்கும் தான்..
உனக்கு நினைவுத் திறன் அதிகமா..
கொஞ்சம் தானெனில்
பழகிக்கொள்..
ம்க்கும்..உபதேசங்கள் வேண்டாம் எனக்கு..
உன் கண்ணில் என் அழகு தெரிகிற்தா..
இல்லை..
ச்ரி..என்ன தெரிகிறது..
நாமிருவரும் ஜெயிக்க வேண்டும்..
அப்போ சரி..
வா..
செம்மொழியில் இருவர் பாடியது என்றும்
தமிழில் டூயட் எனச் சொல்லப் படுவதுமான
.அந்தப் பாடலை.. பாடலாம்..வா..
-
வா வழி காட்டுவேன்
தா பெருக்கித் தருவேன்
சொல் விளங்கிக் கொள்வேன்
பார் திறந்து வைத்தேன்
பாதியாய் நானிருப்பேன்
முழுதாய் மாற்றுவேன்
-
மாற்றுவேன் என்ற் நீயும்..
மாறிய மாய மென்ன
காற்றிலே அலைந்து பாயும்
கார்குழல் முடிந்த தென்ன..
ஊற்றென சிரிக்கும் தன்மை
உதிர்ந்துமென் நகையாய் மாறி
ஆற்றலைக் காட்டி டாமல்
அடங்கிய நிலைதான் என்ன?
**
எனக்குத் தெரிந்த பெண்ணொன்று..
என்னிடம் வளர்ந்தாள் அவளின்று..
எங்கே சென்றாள் தெரியவில்லை..
என்ன ஆனதோ புரியவில்லை..
மழலைப் பருவம் முதற்கொண்டு
மங்கை யாக மாறும்வரை
அழகிய அவளின் அசைவுகளும்
அளவாய்ப் பொங்கும் உணர்வுகளும்
பழகிய எனக்கு இப்பொழுது
புதிராய்ப் போன தேனிங்கு..
வளர்ந்து விட்டாளா என்மகளும்..
வியப்பாய் மகிழ்வாய் இருக்கிறது..
**
அம்மா கொஞ்சம் புலம்பாதே..
அன்பைப் பொழிந்தே மயங்காதே..
சும்மா புகுந்த விடந்தன்னில
சுகமாய் இருக்க விழைந்தே தான்
என்மெய் தனையே மாற்றிவிட்டேன்..
எளிதாய் இதையே எடுத்துக்கொண்டேன்.
மாற்ற்ம் என்னும் ஒன்றேதான்
மாறா விஷயம் தெரியாதா..
**
-
தெரியாதா சாத்திர நூல்கள் உரைகள்
வேத பாடங்கள் மேதாவி விளக்கங்கள்
வினவினான் பண்டிதன் பாமர படகோட்டியை
அவனோ படகில் பழுது நீந்த்த்தெரிந்தால்
உம் உயிர் உமக்கு என்று அறிவித்தான்
அந்தோ மூழ்கியது கர்வம் பரிதாபமாய்
-
பரிதாபமாய்த் தான் இருக்கிறது..
*
நிரந்தர எதிரிகள்
தற்கால நண்பர்களாவதும்..
இலவசங்கள் மக்களுக்கு அணிவகுப்பதும்..
இதையும் மீறி
மக்கள் நல்வாழ்வுக்காக அர்ப்பணிக்கிறோம்
என்று அறிவிப்பதும்..
எல்லாம் பணத்தை மட்டும் மையமாகக்
கொண்டு காய்களை நகர்த்துவதும்..
அதைக் கேட்டுக் கொண்டு
பாமரர்கள் நம்புவதும்..
*
எல்லாம் பார்க்கையில்
பரிதாபமாய்த் தான் இருக்கிறது..
மிக மோசமான நிலையில்
இன்னும் ஒன்று..
அது மனித நேயம்..
**
-
மனித நேயம் மறந்து மதநேயமாகி
மண்ணில் மறையும் மனிதம்.
-
கிறுக்கன்
-
மனிதம் என்றும் புதிர்தானோ
மாட மாளிகை பிடிக்காதோ
மண் குடிசையில் தழைக்குமோ
கணக்குப் போட தெரியாதோ
அடித்த கையை வருடுமோ
அழுத கண்ணை துடைக்குமோ
உடுக்கை இழந்தவன் கை போலே
ஒடி வந்து உதவுமோ உருகுமோ
பலனை எண்ணாத பரோபகாரமோ
என்றும் ஒரு கண்ணோடு சேர்ந்தழும்
மறு கண்ணின் இயல்பின் குணமோ
வற்றாத உயிர்மையின் ஊற்றோ
-
ஊற்றோ;
அருவியோ.
காட்டாற்று வெள்ளமோ;
சூழலைப் பொறுத்துப்
பொங்கிடும் கவிதை..
-
கவிதையால் கவியாகி
புவி ஆள்பவரும் உண்டு
கவிதையில் விதை இல்லாது
வெறும் கதையாகி
கதைப்போரும் உண்டு
சொத்தை கவிதை கொண்டும்
சொத்தை சேர்க்கும்
வித்தை சிலர்க்கே
சொந்தம்.......
-
கிறுக்கன்
-
சொந்தம் சுருங்கித்தான் போனதின்று
ஒரு பிள்ளை பெறுவதே பெரும்பாடு
அண்ணா தங்கை அத்தை பெரியப்பா என்ற
ஆலமரக் கிளைகள் விழுதுகள் தொலைந்து
பனை மரங்கள் ஆகி நிழலின்றி வாடுது
பாலைவனமாய் புதிய சமுதாயம் ஒன்று
-
ஒன்றிலே அரையைக் கொடுத்து..
..ஒன்றியச் செயலாள ராகி..
ஒன்றியே இரண்டாய் ஆக்கி..
..ஊராட்சித் தலைவ ராகி..
ஒன்றுடன் பலதும் வைத்து..
..ஒழுங்காக அணிகள் சேர்த்தே...
ஒன்றாக வெற்றி பெற்றான்..
..ஓரினத் தலைவ னானான்...!
-
தலைவனானான் பழங்காவிய பாணியில்
விசிலடிக்கும் நண்பர் குழாம் உசுப்பவே
பள்ளிக்கூடப் பிள்ளையை தொடர்ந்தான்
அயராது மாறன் கணைகளை தொடுத்தான்
அருமையான பல நவீன வழிகளின்றிருக்க
அரும்பிய மீசை வயதுக்கு வந்ததைச் சொல்ல
விளையாடுகிறான் பிருந்தாவனக் கண்ணன்
வீரமான விவரமான வித்தகன் களிப்புடனே
-
களிப்புடன் கடந்து சென்ற
..கன்னியின் உருவம் கொஞ்சம்
உளியினால் செதுக்கி வைத்த
..உணர்வுகள் பொங்கும் சிற்பம்
விழிப்புடன் எழுந்து வந்து
..விந்தையாய் நடந்தே நெஞ்சைக்
கிழிப்பதாய் உள்ள தென்று.
..கிட்டப்போய்ச் சொல்ல லாமா...
-
சொல்லலாமா உண்மையை
காப்பி நன்றாயில்லை
ஒப்பனை சரியில்லை
பையில் பணமில்லை
என் தாய் நல்லவள்
இப்படி போட்டுடைப்பது
தனக்கு லட்சணமில்லை
நல்லதே நடக்காது
பொறுமை அவசியம்
புருஷனுக்குத் தெரியும்
-
தெரியும்ப்பா..
பாத்துப் படிக்கிறேன்..
புத்தகத்தை வாங்கிக்
குட்டிப் பையன்
பாசுரம் படிக்கையில்
சற்றே தவறாகி விட..
ஒழுங்கா சரியாப் படி
அப்பா கொஞ்சம் கோபமாய்க் கிள்ள
பார்த்தும் கேட்டும் கொண்டிருந்த
விக்ரகத்துக்கு வலித்தது...
-
வலித்தது மிகவும்
வன்முறை பார்க்கையில்
வினயம் வெல்கையில்
வஞ்சம் சிரிக்கையில்
விரிவான விதத்திலே
வெள்ளித் திரையினில்
வக்கிரம் விரிகையில்
விடமே இவ்விருந்து
-
விருந்து பிரமாதம்..
உண்டவர் கொடுத்தவரிடம் சொல்ல
கொடுத்தவர் சமையல் நிர்வாகியிடம் சொல்ல
சமையல் நிர்வாகி நினைத்துக் கொண்டார்
பத்து சதவிகிதம் உயர்த்த வேண்டுமென..
-
வேண்டுமென விரும்பிய மாற்றமிதுவா
விபரீதமான விசித்திரமான விளைவா
ஆண்டாண்டு காலமாய் இங்கு ஓர் வழக்கம்
அடிமையாய் மருமகளை நடத்தும் பழக்கம்
ஆண்மகனை பெற்றவளின் அகந்தை அன்று
அடக்கியாண்டது தன் வீட்டுக்கு வந்தவளை
அன்னையிடம் நல்ல பெயர் வாங்குவாளா
அப்பாவி புதுக் கணவன் மிக வருந்தினான்
ஆனாள் பெற்றவளின்று படுவதை பார்க்கிறான்
அன்று அந்தியில்தான் கொடுமை மாமியாருக்கு
ஆரம்பம் நரகம் இன்று மாமியாரனவுடனேயே
-
உடனே கிளம்பு...
சமயங்களில் குஷி கிளம்பும் அப்பாவுக்கு..
மீனாட்சி அம்மன் கோவிலோ..
டவுன் ஹால் ரோடு ஷாப்பிங்கோ...
ஆவணி மூல வீதி நகைக் கடையோ..
அதுவும் சினிமா என்றால்..
ஞாயிறு மாலை நாலே முக்காலுக்குச் சொல்வார்..
அம்மா அசர மாட்டாள்..
மெல்ல முணுமுணுத்து
என்னை ரெடிபண்ணச் சொல்லி
அக்கா,தங்கைகளை டிரஸ்மாத்தச் சொல்லி
தானும் புடவை மாற்றி
ஆடி அசைந்து கிளம்பினால்
வெளியில்
ரிக்*ஷா முருகன் தயாராய் இருப்பான்..
லெதர்சீட்டில் அக்கா அம்மா உட்கார
எதிரில் நானும் தங்கையும் அமர
சிம்மக்கல், யானைக்கல், நெல்பேட்டை
வழியாக ஊர்கோலம்கிளம்பி
சிந்தாமணிதியேட்டரை அடையும்....
பாரேன் கூட்ட்த்தை
ஞாயித்துக் கெளமை ஈவ்னிங்க் ஷோ
எம்ஜியார் படம்மா எங்கே கிடைக்கும் டிக்கட்
நாங்கள் முணுமுணுத்து நிற்க
முன்னால் சைக்கிளில் வந்திருக்கும் அப்பா
மேனேஜரிடம் பேசி
டிக்கட் எடுத்து வைத்திருப்பார்..
உள்ளே சென்று படம் பார்த்து
திரும்பினால் மறுபடி ரிக்*ஷா
மறுபடி ஊர்வலம்..
இழுத்துப் போத்திக்கோ என்ற்படி
பின்னால் சைக்கிளில் அப்பா...
பாட்டு நல்லா இருந்துச்சு.. அக்கா சொல்வாள்
அம்மா..ம்ம் அதே கதை தான்..
ஃபைட்சூப்பர்டா ...தங்கை..
போடி என்ன நடிக்கிறார் என்பேன்
சிவாஜிபிரியனான நான்..
ம்ம்.. அது அந்தக் காலம்..
இன்றோ..
வெளியில் செல்லத் தேவையில்லை
தொலைக்காட்சி,குறுந்தகடு,
நீள் தொலைக்காட்சித் தொடர் என..
அப்படியே கிளம்பலாம் என்றாலும்
பையன் முன்பதிவுசெய்து..
அப்பா.. நீயும் அம்மாவும் தமிழ் போ..
7.40க்கு காட்சி...
நானும் தங்கையும்
ஹிந்தி 6.50க்குக்காட்சி..
நாங்க படம் முடிச்சு
வெய்ட் பண்றோம்..
பின் காரில் செல்லலாம்..
போனவாரமே பண்ணிட்டேன்.. என்கிறான்..
**
காலங்கள் மாறும் போது..
காட்சிகளும் மாறுகின்றன..
காட்சி நேரங்களும் தான்...
********
-
நேரங்களும் தான் நகருது வித்தியாசமாய்
றெக்கை கட்டிக்கொண்டு சில சமயங்களில்
நத்தை வேகத்தில் பிற பொழுதுகளில்
நின்றே கூட போகிறது அதிசயமாகவே
-
அதிசயமாகவே தான் இருந்த்து..
வீட்டில் இருந்து சைக்கிளை
இரண்டு மிதி மிதித்து
ஆறுமுச்சந்தி சென்று கடலைக் கடையில்
சூடாக வறுகடலை வாங்கி,
பின் கடவுள் இல்லை என்ற போஸ்டருடன் இருக்கும்
ஆறுமுகவிலாஸில் பக்கோடா வாங்கி
மறுபடி மிதித்து
அக்காவீடு வந்து கொடுத்த போது
ரொம்ப தாங்க்ஸ்டா எனச் சொல்லி
ஆர்வமாய் அக்கா சாப்பிட்ட்தைப் பார்த்த போது..
**
அக்காவுக்கு எதிலும் அலட்சியம் ஜாஸ்தி..
ஏதாவது மேட்சில் யாராவது நன்றாக விளையாடினால்
பாராட்ட மாட்டாள்..
உருகி உருகி சிவாஜியின் நடிப்பிற்குக் கண்கலங்கினால்
ச்ச் ப்ப்.. இது ஜான்வேய்ன் ஏற்கெனவே பண்ணிட்டாரே என்பாள்..
உடைகள் உடுத்துவதிலும்
ஒரு அலட்சியம்
கொஞ்சமே கொஞ்சம் மேட்சிங் இருக்கும்
பவுடர் பூச மாட்டாள்..
உதட்டுச் சாயம் ம்ஹீம்..
ஆனாலும் அழகாய் இருப்பாள்..
அம்மா ஏதாவது வேலை சொன்னால்
அப்படியே ஒதுக்கிவிடுவாள்..
சும்மா படிப்பு ரேடியோ என்றால் எப்படி
போற எடம் எப்படி இருக்கோ என்றால்
எல்லாம் அப்ப்ப் பார்த்துக்கலாம் என்பாள்..
இப்படிப் பட்ட அக்கா ஒரு நாள்
பக்கத்துத் தெரு பாஸ்கருடன் ஓடிப் போய்
திருமணம் செய்து அங்கேயே குடித்தனம் வந்தபோது
அம்மாவுக்குக் கோபம்;கண்ணீர்..
அப்படி என்ன அதிசயத்தை அந்தப் பையனிடம் கண்டாள் என..
அப்பா வழக்கம் போல் மெளனம்..
பள்ளி செல்லும்போது கொஞ்சம் நான்பார்த்து வருவேன்..
ஒருநாள் நீ மாமா ஆகப் போறேடா என்ற போது
அம்மாவிடம் சொல்ல..
அது ஒண்ணு தான் பாக்கி
பெத்தவங்கள அழவச்சுட்டு எப்படி இருப்பாளாம்..
நீ அடிக்கடி போகாதே..
**
சில நாட்கள் போகாமல்
பின் எல்லாம் வாங்கிக் கொடுத்தால்
அன்புடன் உண்டு.
கடைசியில் கேட்டாள்.. அம்மா சொன்னாளாடா
இதையெல்லாம் வாங்கிக் கொடுன்னு..
இல்லைக்கா ஏதோ தோணித்து..
பாக்கெட் மணில்ல வாங்கினேன்..
கேட்ட அவளின் கண்கள் கலங்க
முகத்தில் விரிந்த்து ஏமாற்றம்..
-
ஏமாற்றம் தரும் பாதிப்பு இரண்டு
முகம் கூம்பி சோகம் மனதுக்குள்ளே
ரத்தக்கொதிப்பு என்றொரு நிகழ்வு
தானாடாவிட்டாலும் ஆடும் சதையாய்
புத்தியை தாண்டி வரும் விளைவு
வைத்தியம் வேண்டும் தீரா வியாதி