டெலி சிப்ஸ்
'நடந்தது என்ன?' "நிஜம்', "நம்பினால் நம்புங்கள்' என சில சேனல்கள் இரவு நேரங்களைத் த்ரில்லர் ஆக்கி வரும் நிலையில், அதே பாணி தொடரை விரைவில் ஜெயா டி.வி.யும், ராஜ் டி.வி.யும் கையில் எடுக்கிறது.
சன் நியூஸ் தொலைக்காட்சியில் நடந்தவாறே செய்திகளை வாசிக்கும் ஸ்ரீவித்யா ஸ்ரீனிவாசன் சாஃப்ட்வேர் நிறுவனம் ஒன்றில் மனிதவள மேலாளராகப் பணிபுரிந்து வருகிறார். தமிழ் மொழியில் அதிக ஆர்வம் உள்ள இவர் நாலாயிரத் திவ்ய பிரபந்தத்தை அட்சரம் பிசகாமல் அப்படியே சொல்கிறார்.
சன் டி.வி.யில் "இளமை புதுமை', "காமெடி டைம்' என அலப்பரை கொடுத்த அர்ச்சனா. தற்போது, "பிச்சாண்டி குளம் ஃபாரஸ்ட் கன்சல்டன்சி' என்ற நிறுவனத்தில் திட்ட அதிகாரியாக பணிபுரிந்து வருகிறார். அடையாறில் அமைக்கப்பட்டுள்ள பூங்காவை அழகுப்படுத்தும் பணியை செய்தது அந்த நிறுவனம்தான்..
தொகுப்பாளினி ஹேமா சின்ஹாவிற்கு வீட்டில் மாப்பிள்ளை தேடும் படலம் ஆரம்பமாகிவிட்டது. டி.வி., மீடியா துறைக்குச் சம்பந்தமே இல்லாத நபர்தான் தனக்கு மாப்பிள்ளையாக வர வேண்டும் என்று முக்கிய கண்டிஷன் போட்டியிருக்கிறார் ஹேமா சின்ஹா.
"இத்தனை நாளாய் எங்கிருந்தாய்' படம் மூலம் ஹீரோவாகி இருக்கும், ஆனந்தக் கண்ணனைத் தொடர்ந்து தொகுப்பாளர் விஜய் ஆனந்தும் சினிமாவிற்கு வருகிறார். புதுப்படம் ஒன்றில் ஹீரோவாக ஒப்பந்தம் ஆகியிருக்கும் அவரை இயக்குபவரும் மீடியாவில் இருந்தவராம்.
ரம்யா கிருஷ்ணனின் தங்கை வினயா கிருஷ்ணன் தனக்கு வரும் சீரியல் வாய்ப்புகளை மறுத்து வருகிறார். அக்காவை எதிர்த்து தொழிலில் இறங்கக் கூடாது என்பது ஒரு காரணமாக இருந்தாலும், அக்காவைப் போல் முதலில் சினிமா பயணம்தான் லட்சியமாம்.
விஜய் டி.வி.யின் "ரோஜாக் கூட்டம்' சீரியல் மூலம் கண்களைக் குளமாக்கும் அகிலா, இதற்கு முன் ஈவன்ட் மேனேஜ்மெண்ட் நிறுவனத்தில் மேலாளராக இருந்தவர். சின்ன நிகழ்ச்சி முதல் சினிமா நிகழ்ச்சி வரை சொதப்பல் இல்லாமல் பார்த்துக் கொள்வதுதான் அந்த வேலையாம்.
நடனத் துறையில் அதிக ஆர்வம் உள்ள சொர்ணமால்யா தற்போது "தேவதாசி' நடனம் பயின்று வருகிறார். இதற்காக கும்பகோணத்தில் தங்கி பயிற்சி எடுத்து வந்த அவர், "யாதுமாகி' என்ற புது சீரியலில் நடித்து வருவதால் வார இறுதி நாள்களில் மட்டும் கும்பகோணத்துக்குப் பயணமாகிறார்.
ஜீ டி.வி.யின் "அழகான ராட்சஸி' தொடரில் ஹீரோயினாக நடித்து வந்த சியாமந்தா சினிமாவில் அரிதாரம் பூசியுள்ளார். "வெண்ணிலா கபடிகுழு' விஷ்ணு நடிக்கும் "பலே பாண்டியா'வில் இவர் இரண்டாவது ஹீரோயினாக நடிக்கிறார்.
தொகுப்பாளினி ரம்யா சமீப காலமாக செய்திகள் வாசிப்பதில் ஆர்வம் காட்டி வருகிறார். செய்திகள் வாசிப்பதற்கான அணுகுமுறைகள் குறித்து பயிற்சி மேற்கொண்டிருக்கும் ரம்யாவை இனி செய்தி வாசிப்பாளராகவும் பார்க்கலாம்.